Graad 1 is die jaar waarin klanke woorde word. Die kind leer die alfabet skryf, bou die eerste woorde uit klanke op, en lees teen die einde van die jaar kort stories met begrip. Dit is die grootste enkele sprong in die laerskool.

Wat Graad 1 in Afrikaans dek

• Die alfabet. Elke letter korrek vorm en skryf.
• Enkelklinkers en dubbelklinkers. Die a, e, i, o, u klanke en dan die aa, ee, oo, uu vorms.
• Tweeklanke en drieklanke. Klankkombinasies soos ei, y, oe en eu wat as eenheid gehoor moet word.
• Sigwoorde. Woorde wat op sig herken word omdat hulle nie geklink kan word nie.
• Begripslees. 'n Kort storie lees en vrae daaroor beantwoord.
• Eerste taalwerk. Meervoude, voorsetsels en samestellings.
• Temawoordeskat. My liggaam, my vyf sintuie, emosies, primêre kleure en eenvoudige vorms.
• Spelwoorde. Die eerste amptelike spellys van die skoolloopbaan.

Waar leerders gewoonlik vashaak

Die eerste knoop is die oorgang van los klanke na hele woorde. 'n Kind kan k, a en t perfek uitspreek en steeds nie kat saamvoeg nie. Dit is normaal en dit kom reg met herhaling, nie met druk nie.

Die tweede is sigwoorde. Ouers probeer dikwels help deur die kind te laat klink, maar juis hierdie woorde werk nie so nie. Hulle moet as geheelbeeld ingeoefen word, en dit vat blootstelling eerder as verduideliking.

Die derde is begripslees. Baie kinders lees teen die middel van die jaar vlot en kan steeds nie sê waaroor die storie gaan nie. Lees en begryp is twee afsonderlike vaardighede en albei moet geoefen word.

Ons Graad 1 hulpbronne

• Klanke. Enkel klinkers, dubbel klinkers (21 blaaie), tweeklanke of diftonge (22 blaaie) en drieklanke (20 blaaie) as 'n volledige reeks wat op mekaar bou.
• Alfabet. Alfabet skryf met aktiwiteite, 58 blaaie.
• Sigwoorde. Graad 1 sigwoorde oor 19 blaaie.
• Begripstoetse met memo. Mia en Max, Jasper en Charlie, Rebekka en Matewis, Piekniek in die Park en Die rooi voëltjie.
• Taalwerk. Meervoude, voorsetsels en samestellings, elk met opsomming, woordelys en toets.
• Temas. My liggaam, my vyf sintuie, emosies en gevoelens, primêre kleure en vorms.
• Spelling. Die Graad 1 spelboek met Afrikaanse woorde en Engelse betekenis.

Vir ouers wat alles op een slag wil hê, is daar ook 'n Kompleet pakket wat die hele jaar se werk saamvat.

Waar om te begin

Begin by die klankreeks en werk in volgorde: enkelklinkers, dan dubbelklinkers, dan tweeklanke. Voeg die sigwoorde parallel by, want dié twee spore loop langs mekaar. Los die begripstoetse tot die kind kort sinne vlot lees.

Sien al ons Graad 1 hulpbronne